Нәфкать Нигъмәтуллин: “Җырлап акча эшләмим, җырлау өчен акча эшлим”

- Сез үзләштергән профессияләр арасында музыка, сәнгатькә кагылышлылары юк. Ничек җырлап киттегез?

- Казанда җыр ансамбльләре бик күп иде. “Якты елга”, “Ялкын”, “Яз” ансамбльләрендә җырладым. Дөресен әйткәндә, мин үземне белгәннән бирле җырлыйм. Концертларның берсендә композитор Марс Макаров белән таныштым. Ул миңа: “Сиңа укырга кирәк”, - дип миңа консерваториягә укырга керергә киңәш итте. Анда 7 ел укырга кирәк иде. 7 ел күп дип уйлап, анда бармадым. 1987 елда музыка училищесына укырга кердем һәм профессиональ җырчы булуыма беренче адымнарымны ясый башладым.

- Данир Сабиров сезне елак җырчы итеп күрсәтә. Үпкәләмисезме?

- Юк, бер дә үпкәләмим, ул пародия генә бит. Соңыннан ул минем тавышым белән җырларга тырышса да, барыбер ахырына кадәр җиткереп бетерми. Данир турында бер начар сүз әйтә алмыйм. Сәләте бар аның. Мине күрсәткәндә, арттырып та җибәрә, ләкин, арттырмаса, кызыгы булмас иде.

- Сезнең образыгыз “елак җырчы” түгел бугай бит. Нишләп сездән елак дип көлә икән ул?

- Белмим, бу сорауны аңа бирергә кирәк. Елак җырчы димәс идем үземне. Ретро-җырларның күбесе салмак, ләкин аларны җырлау елау дигән сүз түгел. Әйе, килешәм, күп җырларым драматик, алар тирән эчтәлеккә ия. Кайбер җырларымны башкарганда, үземнең дә күзләремнән яшьләр килә.

- Сез бүген популярмы?

- Егерме биш ел сәхнәдән төшмәвем белән мин үземне озын гомерле җырчы дип саныйм. Ел әйләнәсенә Россия буйлап традицион концертларым әле тукталмаган. Һәр заманның үз җырчысы, үз җыры була. Без дә заманадан калышмаска тырышабыз, яңа стильдәге дәртле яңа җырлар башкарабыз.

- Җырлап акча эшләп буламы?

- Әгәр җырны кәсеп итеп, акча өчен генә эшләсәң, бу уңыш китермәс дип уйлыйм. Мин җырлап акча эшләмим, ә җырлау өчен акча эшлим. Үзең аңла, сәхнә чыгымнар таләп итә.

- Бүген сезнең концертларыгызга халык киләме?

- Килә, элеккечә булмаса да, килә. Килмәсә, концертлар белән йөрмәс идек. Коллективымда ун кеше эшли. Барысын да тәэмин итәргә кирәк. Казанда, Уфада ел саен яңа программалар тәкъдим итәбез.

Бу хакта тулырак: https://intertat.tatar/shou-biznes-yanalyklary/n-fkat-nigm-tullin-yrlap-akcha-eshl-mim-yrlau-chen-akcha-eshlim/

Фото: Рамил Гали