Татарстан яшьләре интернеттагы «капканнарга» төшмәскә өйрәнде

10 марттан 17 апрельгә кадәр республиканың барлык 45 муниципаль берәмлегендә узган бу программа мәктәп укучыларын, студентларны, педагогларны һәм ата-аналарны берләштерде. Төп игътибар яшьләр арасында экстремизм һәм террорчылык идеологиясенә каршы торуга юнәлтелде. Өч атна эчендә оештырылган 128 чарада 11 меңгә якын кеше катнашты. Катнашучыларга цифрлы гигиена кагыйдәләре, диверсияләр өчен каралган юридик җаваплылык, деструктив төркемнәргә җәлеп итү ысулларын тану һәм аларга каршы тору юллары турында тәфсилләп аңлаттылар. Шулай ук манипуляция механизмнары, буллинг һәм психологик халәтләрне профилактикалау мәсьәләләре дә читтә калмады. Татарстанның террорчылыкка каршы комиссия аппараты җитәкчесе Илдус Гәрәев ассызыклаганча, проектның төп бурычы — яшьләрдә террорчылыкка каршы тотрыклы фикерләү формалаштыру һәм аларны диверсия эшчәнлегенә җәлеп итүне булдырмау. Татарстан Рәисе Рөстәм Миңнеханов куйган бурыч нигезендә, һәр укучы террорчылыкның җинаятьчел асылын аңларга тиеш. Чаралар барышында яшьләр лекцияләр тыңлау белән генә чикләнмичә, интерактив форматта — махсус квизлар һәм реаль ситуацияләрне тикшерү аша үз белемнәрен сынадылар. Проект Татарстанның Иҗади яшьләр академиясе һәм Яшьләр ресурс үзәге тарафыннан, республика министрлыклары һәм Татарстан Рәисе гранты ярдәмендә тормышка ашырылды. Гәрәев билгеләп үткәнчә, 2024 елдан башлап бу проект куркынычсызлыкны тәэмин итүдә мөһим корал булып тора.