Район җитәкчеләрен сөйләм сәнгатенә өйрәттеләр 

Татарстан Республикасы Президенты каршындагы Татар телен саклау һәм үстерү мәсьәләләре комиссиясе республикабызда татар теленең әдәби матурлыгын, зәвыгын районнарга йөреп пропагандалау максатында, урыннарда төрле дәрәҗәдәге җитәкче һәм хезмәткәрләрне халык белән аралашу, чыгышлар ясау осталыгына өйрәтү буенча мастер-класслар уздыра. Казан дәүләт мәдәният институты белгечләре тарафыннан оештырылган «Сөйләм теле һәм чыгыш ясау сәнгате нигезләре» дип аталган татарча мастер-класс 16 декабрь көнне Җәлил поселогының мәдәният сараенда узды. Аңа муниципаль район Советы һәм Башкарма комитеты җитәкчеләре, хуҗалык һәм предприятиеләр, мәдәният һәм мәгариф бүлекләре, социаль яклау хезмәте, пенсия фонды һ.б. структура җитәкчеләре, мәктәп директорлары, балалар бакчалары мөдирләре, муниципаль хезмәт вәкилләре һәм халык белән эшли торган хезмәткәрләр чакырулы иде. Шигъри-музыкаль композиция формасында әзерләнгән лекция һәм мастер-класслар барлык катнашучылар өчен дә файдалы һәм кызыклы булды.

Альбина Сабирова язмасы, фотолары hәм видеолары