Райондашыбыз Софья Әхмәдуллинаның китабын укымадыгызмы әле?

«Миңа еш кына: „Сез ничек тәрбияче булып киттегез, ничек озак еллар балалар бакчасы мөдире булып эшләдегез?“ — дигән сорауны бирәләр иде. Еллар үткәч, инде хәзер лаеклы ялда булгач, бу сорауны үз-үземә бирәм».

Россия халык мәгарифе отличнигы, Республиканың атказанган укытучысы, «Казанның 1000 еллыгы» медаленә, «Ветераннар хәрәкәтендә казанышлары өчен» күкрәк билгесенә лаек булган, кырык елга якын гомерен балаларга мәктәпкәчә белем бирүгә багышлаган райондашыбыз — ветераннар хәрәкәте активисты Софья Әхмәдуллинаның «Тормыш диңгезен кичкәндә» дип исемләнгән китабы дөнья күрде. Бу җыентыкка аның балачак, мәктәп, училищеда укыган чорлары белән бәйле хатирәләре, район мәгариф бүлегендә, балалар бакчасында эшләгән еллары истәлекләре, аның хакында хезмәттәшләре, якыннары язган мәкаләләр тупланган.