“КабакШОУ” кысаларында уздырыла торган “Кабак (һәм) каләм” бәйгесенең икенче катнашучысы

Күңелемдә бер уй туды,

Ямьле язлар җиткәндә,

Кабак орлыгын шыттырып,

Утырттым бер түтәлгә.

Борын-борын заманда, - дип,

Уйлый күрмәгез, тагын,

Беркөн чыксам, исем китте,

Үсеп ята кабагым.

Зәңгәр күктә кояш балкый,

Сибә җылы нурларын,

Яңгыры да явып китә,

Үрмәли бит кабагым.

Яфраклары җилпәзәдәй,

Чәчәкләре сап-сары,

Чүпләр чыкса утап торам,

Миңа юктыр моң зары.

Ай үсәсен ,көн үсә ул,

Кабакчыклар зурая,

Авырлыгын белим, - дисәң,

Әйдә,күтәреп кара!

Көзге бакчамны тутырып,

Тәгәрәшеп яталар,

Мондый дәүләт, чын хәзинә,

Я, әйтегез, кемдә бар?

Витаминнар җыелмасы,

Тупланган зууур кабакка,

Лимон, апельсин, бананнар,

Торып-торсын бер якта.

Сөмбелә бәйрәме җитте,

Уңышымны күрегез!

Табынымда сыйланырбыз,

Кунак булып, килегез!✍

ФӘЙРҮЗӘ ХӘБИБУЛЛИНА-ЯХИНА.

ДҮСЕМ.

09-09-2023.

Фото:https://ru.freepik.com/