“Хатлар йорты” берләшмәсе “Ак Барс” хоккей командасы турында татар открыткалары сериясен чыгарды

“Хатлар йорты” берләшмәсе татар телендә “Ак Барс” хоккей командасы клубына багышланган татар открыткаларының яңа сериясен чыгарды.
Берләшмә җитәкчесе Энҗе Садыйкова үзенең инстаграм битендә яңа коллекцияне анонслады. “Бу коллекция бөтен кеше дә аңлый торган көчле татар сүзләре ярдәмендә хоккейны бөтенләй икенче яктан ача”, - дип билгеләп үтә ул. Аның сүзләренә караганда, открыткалар сериясе “Ак Барс” хоккей клубының Гагарин Кубогы өчен көрәш башлавына багышланган. Казан командасы Көнчыгыш конференциянең ярымфиналына чыкты, дип хәбәр итә “Татар-информ” мәгълүмат агентлыгы.
- Бу котлаулар сезнең дусларыгыз, якыннарыгыз, туганнарыгыз һәм җанатарлар өчен бик әйбәт бүләк булачак! – дип өсти “Хатлар йорты” җитәкчесе.
Открыткаларның күбесендә бозда килеп чыга торган ситуацияләр сурәтләнгән. Мәсәлән, “Көрәш” язуы сугыш сурәтенең дәвамы булып тора. “Ышаныч” сүзе язылган открыткага Татарстан Республикасы Президенты Рөстәм Миңнехановның хоккей шлемы киеп төшкән фотосы төшерелгән. Язулар рус теленә генә түгел, инглиз теленә дә тәрҗемә ителгән.