Салкыннар башлану белән, машина йөртүчеләргә тәгәрмәчләрне генә алмаштырып калмыйча, багажникны да кирәкле әйберләр белән тулыландырырга кирәк. «Татар-информ» агентлыгы хәбәр иткәнчә, Роскачество белгечләре кышкы сезонга алдан әзерләнү юлдагы көтелмәгән хәлләрдән сакланырга ярдәм итәчәген искәртә.
Кышын машина багажнигында нәрсәләр булырга тиеш:
- Запас «незамерзайка». Юлга чыкканда, тәрәзә юу сыекчасының өстәмә канистрасын үзегез белән йөртегез. Ялган товарга эләкмәс өчен, сыйфатлы продукцияне ышанычлы сатучылардан алыгыз һәм шик тудырырлык арзан бәяләрдән качыгыз.
- Двигательне кабызу җайланмалары. Салкын һава торышында аккумулятор көчсезләнергә мөмкин, шуңа күрә эшләтеп җибәрү җайланмасы яки махсус чыбыклар («прикуриватель») бик файдалы булыр.
- Трос һәм көрәк. Машина кар яки балчыкка батып калса, компакт автомобиль көрәге һәм озынлыгы 4–6 метр тирәсе булган сөйрәү тросы (буксировочный трос) ярдәмгә килер.
- Хәвефсезлек чаралары. Багажникта һәрвакыт аптечка, янгын сүндергеч, авария тукталышы билгесе һәм яктылык кайтаручы жилет булырга тиеш.
Юлга чыкканчы үтәргә кирәкле мөһим киңәшләр:
Салкыннар төшкәнче автомобильгә техник диагностика ясарга, запас тәгәрмәчнең яки «докатка»ның барлыгына инанырга кирәк.
Моннан тыш, «ЭРА-ГЛОНАСС» системасының төзеклеген алдан ук тикшереп кую мөһим. Юл-транспорт һәлакәте очрагында ул коткару хезмәтләренә авария турындагы мәгълүматны һәм машинаның координатларын автомат рәвештә җиткерә.
Рәсем: ясалма интеллект
Нет комментариев