Илнара ханым “Ана даны” медаленә лаек булды

Татарстанның дәүләт суверенитеты турындагы декларация кабул ителүгә багышланган һәм район күләмендә үткәрелгән зур тантанада тырыш хезмәтләре белән хөрмәт казанган, яшьләр хәрәкәтендә башлап йөргән иң актив райондашларыбызга төрле дәрәҗә дәүләт бүләкләре тапшырылды. Ә инде Дүсем авылында яшәүче биш бала әнисе Илнара Гарифуллина район башлыгы Фәрит Хөснуллин кулыннан “Ана даны” медален кабул итеп алды.
Билгеле булганча, бу медаль тәртипле, башка балаларга үрнәк булып торырлык күп бала тәрбияләүче аналарга бирелә. Ә Рөстәм һәм Илнара Гарифуллиннар гаиләсендә биш бала үсә.
- Тәртипле, тату һәм үрнәк гаилә, - диләр авылдашлары алар хакында.
- Мондый бүләккә лаек булырмын дип һич көтмәгән идем. Искәрмәстән килгән олы шатлык булды бу вакыйга, - ди Илнара ханым үзе.
Зөлфия Шәрипова язмасы һәм фотосы