Яз нәүрүз белән килә, - ди Колмәт авылы халкы

 Алдагы көндә балалар белән өйдән - өйгә кереп такмаклар, теләкләр әйтә - әйтә Нәүрүз бәйрәменә ярма, май, йомырка, чәйгә тәм - томнар җыеп йөрдек. Мул куллы хуҗабикәләргә балалар чын күңелдән рәхмәт әйттеләр. Бәйрәмгә килүче кунакларны Шайхразиева Дания кайнар коймаклар пешереп каршы алып торды. Ир - егетләребез учак ягып казанда ботка пешерделәр, күмер самаварында чәй кайнаттылар. Ә балалар рәхәтләнеп төрле хәрәкәтле уеннарда, эстафеталарда көч сынаштылар, күңел ачтылар. Соңыннан барыбыз да тәмле боткадан авыз иттек, коймак, күчтәнәчләр белән чәй эчтек. Ә ак яулыклы әбиләребез илгә иминлек теләделәр.