Татарстанда мошенниклар бәйрәм һәм ял көннәрендә активлаша

Бу хакта ТР буенча Эчке эшләр министрлыгының Киберҗинаятьләргә каршы көрәш идарәсе (УБК) аеруча мөһим эшләр буенча оператив вәкиле Радис Юсуповка сылтама белән «Татар-информ» МА хәбәр итә.

Ведомство вәкиле сүзләренчә, җинаятьчеләр кичке вакытны, ял һәм бәйрәм көннәрен юри сайлыйлар. Хисап гади: бу вакытта банклар эшләми, һәм кеше мәгълүматны тикшерү яки счетларын ябу өчен шәхсән офиска килә алмый. Мошенниклар, кешенең каушап калуыннан файдаланып, аны тизрәк «эшкәртергә» тырышалар.

Радис Юсупов шулай ук ата-аналарны язгы каникуллар чорында игътибарлырак булырга чакырды. Интернетта күп вакыт уздыручы үсмерләр еш кына манипуляция корбанына әйләнә. Җинаятьчеләр ата-аналарның карта мәгълүматларын алырга яки балаларны куркыныч схемаларга җәлеп итәргә мөмкин.

Истә тотыгыз: банк яки полиция хезмәткәрләре беркайчан да телефон аша ашыгыч рәвештә «куркынычсыз счетларга» акча күчерүне таләп итми.