Татарстанда быелгы язгы ташуга әзерлекне тикшерделәр

ТР Премьер-министрының беренче урынбасары Рөстәм Нигматуллин белдергәнчә, Татарстанда быел көчле ташу ихтималы югары. Моның төп сәбәбе — яуган явым-төшем күләменең климатик нормадан күпкә артып китүе.

«Татар-информ» МА хәбәр иткәнчә, Нигматуллин әзерлек барышында берничә мөһим проблеманы билгеләп үткән:

 * гидротехник корылмаларның канәгатьләндерерлек булмаган торышы;

 * елга үзәннәрен чистарту зарурлыгы;

 * ярларны ныгыту һәм елга төбен тирәнәйтү эшләре кирәклеге.

Хәвеф-хәтәрне киметү максатыннан, ТР Гадәттән тыш хәлләр комиссиясе февраль башында үк җирле хакимиятләргә һәм оешмаларга саклану чараларын күрергә кушты. Хәзер районнарда ташу нәтиҗәләрен йомшарту буенча актив эш алып барыла.