Сөлек халкы бәйрәм чараларыннан канәгать калды

"Картаймый әле безнең күңелләр, беркайчан да бирешәчәк түгелләр." исемле концерт программасы белән Рафаил Гыйләҗев җитәчекчелегендә район ветераннары Сөлек халкын ял иттереп киттеләр. Асия Мостафинаның җырларына, Анна Гомәрованың, Ринат Гыйләҗевның дәртле биюләренә сокланмаган кеше булды микән? Залны гармун, курай,тальян, авыз гармуны, баян, аккордеон моңнарына күмүче Валентин Кузьмин, Рафаил Гыйләҗев, Рафис Уразаев талантлары белән шаккаттырдылар.

Шулай ук театр коллективы тарафыннан Фоат Садриевның "Сиңа гына әйтәм" исемле комедиясе күрсәтелде. Тамашачылар бик җылы кабул иттеләр, залда алма төшәр урын да юк иде.