Сарманда ретро кичә үтте

28 июньдә Сарманның үзәк ял паркында китапханәчеләр тарафыннан ретро стилендә кичә үткәрелде. Чара матур борынгылык рухы белән сугарылган иде, әйтерсең лә халык тарафыннан яратылган элекке "кичке уеннар" кире әйләнеп кайтты. Китапханәчеләр кигән татар күлмәкләре кичәгә матур миллилек өстәп торды. Паркта ял итүче кешеләр, үзләре дә сизмәстән, бик актив рәвештә тамашага җәлеп ителде. Бергәләп моңлы җырлар җырладылар, дәртле биюләр биеделәр. Шаян уеннарда катнашып, табышмакларга җаваплар табып, оештыручылар тарафыннан баллы сюрпризлар алдылар. Ә соңыннан барысы бергә, күмәкләшеп, татар көйләренә биеп, рәхәтләнеп күңел ачтылар.

Фоторепортаж