Сарманда иң зәвыклы бакча – Сәвия апада

Сарман авылында яшәүче Сәвия апа Фәретдинова бакчада эшләргә ярата. Яз җитү белән, төрледән-төрле чәчәкләр утырта, көздән чәчелгәннәре дә бар. Үсентеләрнең кайберләрен үзе әзерли, бер ишләрен сатып ала, күпьеллыклары да шактый. Алма агачы төбеннән өйдәге гөлләренә урын биргән. Алары ачык һавада яхшырак үсә, салкын җилләрдән, кояшның кайнар нурларыннан агач ботаклары саклый, ди. Җимешләрен күтәрә алмый сыгылырга мәҗбүр булган алма ботагы да, тәлгәш булып, гөл, чәчәк түтәленә яткан... Сандугачлар җырына күмелгән бакчаның сихрилеге - әйтеп бетергесез.