Сарман малайлары – Татарстан өметләре

Ноябрь башында башкалабыз Казанда өстәл теннисы буенча «Татарстан Республикасы өметләре» дигән ярыш уздырылды.
Район данын яклап уйнаган Сарман гимназиясе укучылары уңышлы гына чыгыш ясадылар. 9 яшьлек уенчылар бәйгесендә Булат Латыйпов IV урынны яулады. 10 яшьлек малайлар арасында Динар Йосыпов, барлык көндәшләрен дә җиңеп, беренче булды. 2000-2001 нче елгы спортчылар арасында Эмир Хаҗиев - 12 нче, Артур Төхбәтуллин - 25 нче урыннарда. Авыл районнары уенчылары арасында призлы урыннарны алган спортчылар аерым да бүләкләнделәр. Алар арасында Динар - I, Булат - II, Эмир - III, Артур - VI урында.
17 нче ноябрьдә өстәл теннисы уенын яратучылар мәктәп укучылары арасында үткәрелгән район беренчелегендә ярыштылар. 24 нче ноябрьдә исә Татарстан Республикасының атказанган агрономы М.Хөснуллин истәлегенә багышланган V республикакүләм ярышлар узды.