«Россия көче» марафоны Татарстанда биш этаптан торачак

Марафон ачык тренировкалар белән генә чикләнмәячәк – ул биш тематик атнаны үз эченә ала. Проектның төп максаты – танылган спортчылар катнашында бушлай дәресләр оештыру аша халыкта сәламәт яшәү рәвешен һәм физик активлыкны популярлаштыру.

Светлана Захарова сөйләвенчә, тематик атналыклар түбәндәгечә планлаштырыла:

• 11–17 май – махсус хәрби операция ветераннары һәм аларның гаиләләре өчен атналык;

• 6–12 июль – гаилә спорты атналыгы;

• 20–26 июль – шахмат атналыгы;

• 3–9 август – инклюзив спорт атналыгы;

• 13–23 август – милли спорт төрләре атналыгы.

Марафонда Татарстанның танылган спортчылары катнашачак. Ольга Павлова билгеләп үткәнчә, «Зенит-Казан» волейбол клубы уенчылары, Гөлнара Галкина-Сәмитова, Данис Зарипов һәм башкалар үз катнашуларын раслаган.

– «Россия көче» марафоны Татарстанда бишенче тапкыр уза. Елдан-ел чараның партнерлар даирәсе киңәя. Быел республиканың Җилкәнле спорт студентлар федерациясе һәм Резинка аша сикерү федерациясе марафонга кушылды, – диде Павлова.