Районда 24 фатирлы йорт төзелә

Район үзәк хастаханәсе территориясендә төзелүче 24 фатирлы йорт ел ахырында хуҗаларына ишекләрен ачачак. 

Агымдагы елның апрель аенда булачак объектка беренче казыкны кагалар. Бүгенге көндә биредә эш кайный. Булачак дүрт катлы күпфатирлы йортның беренче катын өеп бетергәннәр. 

- Яңа елны йорт хуҗалары яңа фатирда каршы алсыннар, дип тырышабыз. План буенча объект ноябрь ахыры-декабрь башында тапшырылырга тиеш. Төзүчеләр тырышалар, вакытларын юкка сарыф итмиләр. Һава торышы яхшы торганда, күбрәк эшләп калырга кирәк, - диде төзелеш участогы мастеры Александр Пичугин. 

Әлеге объектны тулысынча сафка бастыру өчен дәүләт программасы нигезендә республика казнасыннан 40 миллионнан артык акча бүленгән.

Альбина Сабирова язмасы hәм фотолары