Район халкы “Табигать могҗизалары” белән уртаклаша

Халкыбызда “Сентябрьдә син дә бер, мин дә бер” дигән матур мәкаль бар. Көзге муллыкка ишарә бу. Табигать-Анабыз бик юмарт: ел саен диярлек бакчасында тырышып эшләгән кешегә уңышын мулдан бирә. Базларыбыз бәрәңге, чөгендер, кишер, кәбестә һәм башка нигъмәтләр белән тула. Быел да, елы бик килеп бетмәсә дә, “Бәрәңгебез дә уңды, чөгендер-кишерләр дә бар, җиләк-җимешен дә җитәрлек җыйдык”, - диючеләр шактый. Әле табигать безне мул уңыш белән генә түгел, үзенчәлекле, төрле формадагы яшелчәләр белән дә сөендерә. Әйтик, би-и-ик зур яки бик кү-ү-үп кабаклар, йөрәк формасындагы бәрәңгеләр һәм башкалар белән... Әйдәгез әле, аларны төркемебездә “Табигать могҗизалары” дигән күргәзмәгә җыйыйк. Яшелчәләрегезне фотога төшереп, исем-фамилиягезне, яшәгән урыныгызны төркемебездә шушы язма астында комментарийларда калдыра аласыз.
Ә бу фотоларда сез Сарман авылыннан Зоя Шакирҗанова һәм Рәмзия Салихованың уңышлары белән таныша аласыз.