Лилия Галимова Татарстанда пляжларның рәсми рәвештә кайчан ачылачагын әйтте

Татарстан Президентының матбугат хезмәте җитәкчесе Лилия Галимова онлайн-брифингта республикада пляжларның кайчан ачылачагы хакында сөйләде. «Иминлек белән бәйле кайбер сораулар бар. Алар хәл ителми торып, әлбәттә инде, пляжлар ачылмаячак», — диде Галимова. Татарстанда коену сезоны әле дә булса ачылмавы коронавирус инфекциясе таралу куркынычына гына бәйле түгел, дип искәртте ул. Роспотребнадзор һәм Гадәттән тыш хәлләр министрлыгы хезмәткәрләре ел саен пляжларның иминлеген тикшерә. «Узган ял көннәре нәтиҗәләре буенча гына да статистиканың ни дәрәҗәдә куркыныч булуын үзегез дә күреп торасыз. Кызганыч, республикада 10 кешене югалттык. Бу күп кенә кешеләрнең җиһазландырылмаган, коену рөхсәт ителмәгән пляжларны ял итү урыны буларак сайлавы белән бәйле», — дип өстәде Лилия Галимова. Татарстан буенча, Казанны да кертеп, су керү тыелуга да карамастан, моны санга сукмаучыларны ачыклау буенча киң колачлы рейдлар үткәрелде. Пляжлар рәсми төстә ябык булса да, җәй башыннан алып республика сулыкларында инде 36 кеше (шуларның өчесе — балалар) батып үлгән. 

Фото: Владимир Васильев

Чыганак: tatar-inform.tatar