Иске Кәшер авылының игелекле кызы әби-бабайлар белән уртак тел табып эшли

Күптән инде авылның үз кешесенә әверелгән Анастасия апа Кашапованың ишеген шакыдык. Ул безне үзенең җырлары белән дан казанган эте белән бергә каршы алды. Анастасия Вастиряковна ялгызы гына яшәсә дә, аның тормышын ике эте белән өч мәчесе ямьлиләр. Социаль хезмәткәр буларак, Иске Кәшер авылыннан Гөлшат Миңнеголованы билгеләгәннәр үзенә.

— Атнасына өч тапкыр килә. Азык-төлеген дә китерә, түләүләр белән дә булыша, бәйрәмнәрдә дә онытмый мине. Карын да көри, бергә ашарга пешерәбез. Гомумән, нинди ярдәм кирәк, шуны башкара, — диде Анастасия апа.

Быел аның Яхшыбайга күченеп килүенә 24 ел була. Ул беренче көннән үк барысы белән дә уртак тел табып яши башлады. Авыл халкы аны, үз итеп, «Наҗия» дип йөртә.

Аның күршесе Фәрхинур Кашапова да Гөлшат турында бары тик җылы сүзләр генә әйтә ала.

— Шат күңел белән килеп керә, хәлләрне белешә, кан басымын үлчәргә дә ярдәм итә. Кирәкле даруларны, азык-төлекне вакытында китереп җиткерә, идән-тәрәзәләрне дә юа. Бик уңган кеше, эшлекле дә, кешелекле дә. Аның турында "Шәфкать"нең шәфкатьле кешесе" дияргә дә була, — диде ул.

Гөлшат Миңнеголова турында тулырак язманы район газетасының 12 гыйнвар саныннан укыгыз.