Бишкөнлек кыр батырлары бүләкләнде

"Сарман: иң яңа хәбәрләр", 8 август 2026 - 12:25

201

Бүген район башлыгы Фәрит Хөснуллин белән район авыл хуҗалыгы һәм азык-төлек идарәсе начальнигы Николай Сахуриев басу-кырлардагы урып-җыю эшләре барышы белән танышып йөрделәр. Иске Кәшер авылы янындагы көзге бодай басуына тукталып, чираттагы бишкөнлектә югары күрсәткечләргә ирешкән комбайнчыларны бүләкләделәр, хезмәтләре өчен рәхмәт белдерделәр.

Ургычлары 9 метрны тәшкил иткән техниканы иярләүче беренче төркемдә "Җәлил" агрофирмасыннан Илмир Солтанов бу юлы да акчалата бүләккә ия булды. Аны җитәкчеләр икенче урын алганы өчен бүләкләделәр. Ургычлары 6 метрлы комбайннарда ашлык суктыручы механизаторлар арасында да ике алдынгы урын да җәлиллеләрдә булды. Ленар Якупов белән Илдар Харисовның комбайннарында җилфердәүче әләмнәр дә егетләрне җиңүгә рухландыра кебек тоелды.

- Кәефләр шәп, һава торышы яхшы, эшлибез, җиңәбез, - диделәр алар.

Агроном Хәлил Рәхимов та басуда эш барышын күзәтә, киңәшен бирә, кирәкле ярдәмен күрсәтә.

- Егетләр сынатмыйлар, тырышып эшлиләр. Җитәкчелектән хөрмәт күрү аларга стимул бирә, - диде җитештерү комплексларының башкаручы идарәчесе Илшат Вәлиев.