Җәлил поселогы Мәдәният сараенда да халыкны сан алуда катнашырга көтәләр

"Сарман: иң яңа хәбәрләр", 1 ноябрь 2021 - 08:58

578

Районда сан алу буенча 7 стационар участок эшли. Шуларның өчесе – Җәлилдә.

Поселокның Җиңүгә 30 ел урамы, 6 йорт (Мәдәният сарае) адресы буенча урнашкан сан алу участогына 1 контролер, 6 сан алучы билгеләнгән.
- Эш кызганнан-кыза бара, көннән-көн халык та активлаша. Сан алучылар үзләренә беркетелгән участокларда йөриләр. Кайбер йортларга кабат-кабат барырга туры килә. Кемдер өйдә булмый, я эштән кайтып җитмәгән, я башка сәбәп белән очрашырга җай чыкмый. Кайберәүләр, участокка үзем киләм, я онлайн-режимда катнашам, ди. Андыйларның да үткәнме-юкмы икәннәре безнең системада күренә. Авырып, сан алучылар белән күзгә-күз очраша алмаган җәлиллеләр белән телефон аша да аралашабыз, - диде участок контролеры Әлфинур Гарифуллина.
Шулай ук Шәрләрәмә, Ләшәү Тамак авылларында – берәр, Сарманда ике участокта халыкны кабул итәләр.