8 ноябрьдән ялган QR-код сатучыларны һәм сатып алучыларны төрмәгә ябарга мөмкиннәр

Россиядә 8 ноябрьдән вакцина ясату турында QR-кодлар рәсми документ буларак танылачак. Нәкъ шушы көннән Россия Сәламәтлек саклау министрлыгының 1006н санлы боерыгы гамәлгә керә.

QR-кодларның рәсми документ буларак танылачагын октябрь азагында Татарстан Эчке эшләр министры урынбасары Алексей Соколов та әйткән иде, дип хәбәр итә «Татарстан 24» телеканалы.

Министрлыкның боерыгы гамәлгә кергәнче ялган QR-код һәм сертификат ясаган очракта 80 мең сумга кадәр штраф яисә ярты елга кадәр арест янаган. Сертификат рәсми документ буларак танылгач, закон бозучылар бер елга кадәр төрмәгә ябылырга мөмкин. Ялган QR-кодны саткан кеше дә, сатып алучы дә җинаять җаваплылыгына тартылачак.

Чыганак: https://intertat.tatar/news/kadak/03-11-2021/8-noyabrd-n-yalgan-qr-kod-satuchylarny-m-satyp-aluchylarny-t-rm-g-yabarga-m-mkinn-r-5842426