Иске Минзәләбаш мәктәбенең ашханәсе яңартылды

Заман таләпләренә туры китерелеп ремонтланган аш-су бүлмәсен укучылар да бик ошатканнар. Алар башта ашханәне танымый торганнар, укытучылар өчен дә үзгә ул. Ни, дисәң дә, бар нәрсә яңа һәм уңайлы, матур һәм чиста.
— Яңартылган ашханәдә быелдан яңа пешекче эшли башлады. Дөрес, Зөһрә Латыйпова безнең өчен яңа түгел инде, ул — шушы коллектив хезмәткәре. Ашханәбез бик үзгәрде, матурланды, аңа яңа сулыш керде. Барлык җиһазлар, инвентарьләр яңартылды. Табак-савыт юа торган шкаф та бар. Иттарткыч, бойлер, яшелчә саклый торган лар-шкафлар, суыткычлар өр-яңа хәзер, — диде мәктәп директоры Эльвира Каюмова.
Заманча ремонттан соң ашханәнең түшәм-идәне, стеналары үзгәргән, электр хуҗалыгы, җылылык системасы алмашынган.