Рөстәм Миңнеханов Яшь дипломатлар форумында катнашучыларны сәламләде

Бу хакта Татарстан җитәкчесенең матбугат хезмәте хәбәр итә.

Рөстәм Миңнеханов билгеләп үткәнчә, форум җиденче тапкыр уздырыла. Аның сүзләренчә, Россия Тышкы эшләр министрлыгының Яшь дипломатлар советы белән оештырыла торган чаралар яхшы традициягә һәм KazanForum чарасының аерылгысыз өлешенә әверелде. Шушы елларда әлеге вакыйгада 37 илнең 200дән артык вәкиле катнашты.

Татарстан Рәисе Россия тышкы эшләр министры Сергей Лавровка, Яшь дипломатлар советы рәисе Константин Колпаковка һәм тышкы сәясәт ведомствосы коллективына, шулай ук Россия чит ил учрежденияләренә инициативалар һәм проектларга ярдәм күрсәткәннәре өчен рәхмәт белдерде.

Хәзер Казанда «Россия - Ислам дөньясы» стратегик караш төркеменең чираттагы утырышы уза, аны Россия Президенты Владимир Путин кушуы буенча Рөстәм Миңнеханов җитәкли.

Рөстәм Миңнеханов искәрткәнчә, узган ел, 2022 елда, Казан Ислам дөньясының яшьләр башкаласы булды. Ул Идел буе Болгар дәүләтендә Ислам кабул ителүнең 1100 еллыгын бәйрәм итүгә бәйле рәвештә республика өчен аеруча символик булды. Ислам хезмәттәшлеге оешмасының Яшьләр башкаласы программасы кысаларында меңләгән делегатның ун зур проекты гамәлгә ашырылды. Шуларның иң зурысы - Глобаль яшьләр саммиты, ул 46 илдән килгән делегатны берләштерде. «Быел без аны кабат уздырырга планлаштырабыз», - дип өстәде ул.

Республика җитәкчесе шулай ук билгеләп үткәнчә, Татарстанның мөселман илләре белән эше төрле юнәлешләр буенча алып барыла, әмма сәүдә-икътисади өлкәдә багланышлар өстенлекле булып тора.

Фотолар ТР Рәисе матбугат хезмәтеннән алынды.