Татарстанда грипп һәм ОРВИ белән чирләүчеләр саны нормадан 11 процентка арткан

Роспотребнадзорның республика идарәсе хәбәр итүенчә, 15-21 декабрь көннәрендә төбәктә барлыгы 25 640 инфекция очрагы теркәлгән. Белгечләр билгеләп үткәнчә, вирус барлык яшь төркемнәрен дә зарарлый, ә чирләүчеләрнең 81,5 процентында гриппның А (Н3N2) штаммы ачыклана. Коронавируска килгәндә, хәл тотрыклырак: атна эчендә 283 кешедә COVID-19 табылган, бу узган елның шул ук чоры белән чагыштырганда 48 процентка азрак.
Инфекция таралуны туктату өчен, санитар табиблар Сарман районы һәм республика халкына профилактик чараларны истә тотарга киңәш итә. Җәмәгать урыннарында һәм транспортта битлек кию, кулларны еш юу һәм бүлмәләрне җилләтү мөһим. Шулай ук һава торышына карап киенү, витаминнар һәм аксымга бай ризыклар куллану да иммунитетны ныгытырга ярдәм итә. Чирнең беренче билгеләре (югары температура, йөткерү, тамак авырту) пәйда булса, белгечләр үзлегеңнән дәваланырга тырышмаска, ә кичекмәстән өйгә табиб чакыртырга киңәш итәләр.