Татарстанда бер эшсез кешегә 22 буш эш урыны туры килә

Бу хакта ТР «Россиядә эш» Кадрлар үзәгенә сылтама белән «Татар-информ» МА хәбәр итә.

Республикада теркәлгән эшсезлек дәрәҗәсе 0,19% тәшкил итә. 1 августка булган мәгълүматларга караганда, 3 851 кеше эшсез статусына ия, ә вакансияләр банкында 83,5 мең тәкъдим теркәлгән. Ел башыннан бирле мәшгульлек үзәкләренә 18,1 мең кеше мөрәҗәгать иткән, шуларның 9 меңе инде эшкә урнашкан.

Иң кирәкле өлкәләр һәм хезмәт хаклары

Белгечләргә булган төп кытлык төзелеш (барлык вакансияләрнең 55%ы — 46,3 мең урын) һәм сәнәгать (9% — 7,9 мең урын) өлкәләрендә күзәтелә. Шулай ук иң күп эш урыннары тәкъдим ителгән бишлеккә сәламәтлек саклау (3%), мәгариф (2%) һәм транспорт (2%) тармаклары кергән.

Иң зур ихтыяҗ һәм тәкъдим ителгән хезмәт хаклары:

 * Төзелеш: автомобиль йөртүчеләр (103,2 мең сум), прораблар (100 мең сум), инженерлар (99,4 мең сум), изоляциячеләр (93,3 мең сум).

 * Эшкәртү сәнәгате: токарьлар (98,6 мең сум), клепальщиклар (89 мең сум), инженерлар (88,8 мең сум), слесарьлар (87,4 мең сум).

 * Сәламәтлек саклау: табиблар (97,2 мең сум), фельдшерлар (66,3 мең сум).

 * Мәгариф: укытучылар (50 мең сум).

Кемнәр эш эзли?

Регионда рәсми теркәлгән эшсезләрнең күпчелеге — хатын-кызлар (72%). Эш эзләүчеләрнең 61%ы элеккеге урыныннан үз теләге белән эштән чыккан, ә 55%ы югары белемгә ия. Яшь категориясе буенча 35 яшьтән 49 яшькә кадәрге кешеләр өстенлек итә (47%), ә 29 яшькә кадәрге яшьләр өлеше 10% тәшкил итә. Моннан тыш, исәптә мөмкинлекләре чикләнгән 210 граждан һәм эш табуда кыенлыклар кичерүче 1 149 кеше тора.

Ихтыяҗ туган очракта, мәшгульлек үзәкләренә мөрәҗәгать итүчеләр эш бирүчеләрнең ашыгыч ихтыяҗларына туры китереп бушлай яңа белгечлеккә укый ала.