Татарстанда «Абилимпикс» чемпионатында 1700дән артык катнашучы көч сынашты

Чемпионат республиканың 14 муниципаль районында, 35 белем бирү оешмасы базасында узды. Катнашучылар 48 төп һәм 76 төбәк компетенциясе буенча үз осталыкларын күрсәтте. Аларның эшен 661 эксперт бәяләде, ә ярыш мәйданчыкларында 620 волонтер эшләде. Яңа компетенцияләр арасында — «Каш ясау остасы», «БПЛА эшләү һәм җыю», «Реклама белгече», «Социаль тернәкләндерү белгече» һәм «Техник-протезист».

«Абилимпикс» хәрәкәтен үстерү үзәге җитәкчесе Адилә Исхакова: «Быел төбәк чемпионаты бик киң масштабта һәм уңышлы узды. Татарстан вәкилләре, мәсәлән, “Техник-протезист” кебек яңа компетенцияләрдә дә катнаша алды. Бу осталыклар катнашучылар өчен бик кызыклы һәм кирәкле булып чыкты», — диде.

Ярышларга параллель рәвештә 13–30 апрельдә «Мөмкинлекләр фестивале» дә уздырылды. Анда республиканың 12 муниципаль берәмлегендәге 13 махсуслаштырылган «Абилимпикс» компетенция үзәге базасында үсешләрендә авырлыклар булган 500дән артык кеше катнашты. Моннан тыш, Татарстанда беренче тапкыр мәктәпкәчә яшьтәге һәм башлангыч сыйныф укучылары — инвалид һәм сәламәтлек мөмкинлекләре чикләнгән балалар өчен «Һөнәр белән танышу фестивале» оештырылды. 4 муниципаль берәмлектәге 5 мәгариф учреждениясендә 250дән артык бала уен формасында 19 төрле компетенция буенча көч сынашты.

«Яшел хуҗалык хезмәткәре» компетенциясе җиңүчесе Виктория Бокова: «Мин мондый чемпионатта беренче тапкыр катнаштым. Озак һәм нык әзерләндем: модульләр эшләдем, төрле биремнәр үтәдем. Барысы да килеп чыкты, җиңүче булуыма бик шатмын. Чемпионат миңа үз көчемә ышаныч, алга бару теләге бирде. Остазым минем һөнәри үсешемдә зур роль уйный», — дип бүлеште.