Рөстәм Миңнеханов: Россия һәм Ислам дөньясы арасында ышанычлы диалог формалашты

Чарада Россия Хөкүмәте Рәисе урынбасары Марат Хөснуллин, БМО Генераль сәркатибенең Цивилизацияләр альянсындагы югары вәкиле, махсус илче Мигель Анхель Моратинос, РФ Президенты Администрациясе җитәкчесе урынбасары Магомедсалам Магомедов, ИХО Генераль сәркатибе урынбасары Йосыф Әл Дубейи, РФ Президентының Идел буе федераль округындагы тулы вәкаләтле вәкиле Игорь Комаров катнашты.

Утырыш ТР Мөселманнары диния нәзарәте рәисе, мөфти Камил хәзрәт Сәмигуллин башкарган Изге Коръән уку белән ачылды.

Татарстан Рәисе, стратегик караш төркеме җитәкчесе Рөстәм Миңнеханов үз чыгышында халыкара мөнәсәбәтләрдә күп поляр дөнья формалашу тенденциясе көчәйгәнен ассызыклады. Аның сүзләренчә, бу үзгәрешләр Россиянең ислам дәүләтләре белән хезмәттәшлекнең яңа механизмнарын эшләүгә этәргеч бирде.

«Дөнья сәясәтенең төп проблемаларына уртак караш, әхлакый кыйммәтләрнең берлеге – болар барысы да традицион диннәр белән диалог төзүдә уникаль тәҗрибәгә ия булган күпмилләтле дәүләт өчен аерым әһәмияткә ия. Моның ачык мисалы – Казан Кремле, анда Кол Шәриф мәчете һәм Благовещенье соборы янәшә урнашкан», – диде Миңнеханов.

Татарстан Рәисе төркем эшенә күрсәтелгән кызыксыну һәм Россиянең мөселман илләре белән диалогын үстерүгә керткән өлеш өчен рәхмәт белдерде. Ул быел төркем эшчәнлегенең башлануына 20 ел тулуын әйтеп үтте.

«Владимир Путин инициативасы белән Россия ИХОда күзәтүче статусын алды. Бу катлаулы эшнең башында Евгений Примаков һәм Минтимер Шәймиев кебек күренекле шәхесләр торды. Алар нигез салган традицияләр нәтиҗәсендә Россия белән Ислам хезмәттәшлеге оешмасы илләре арасындагы мөнәсәбәтләр конструктив, бербөтен һәм күпкырлы характерга иреште», – диде ул.

Рөстәм Миңнеханов иминлек, террорчылыкка каршы көрәш, икътисад, гуманитар өлкә һәм динара диалог буенча уртак эшләрнең киңәюен аерым билгеләп үтте. Төркем, аның сүзләренчә, һәрвакыт тигезлек һәм гаделлек принципларына тугры.

Катлаулы халыкара шартларда Россия күп поляр дөнья төзү, дәүләтләрнең суверен тигезлеген хөрмәт итү, аларның үз үсеш юлын сайлау хокукын тану һәм рухи-әхлакый ориентирларга таяну сәясәтен дәвам итә, дип ассызыклады Татарстан Рәисе.

Ул АКШның Ирандагы гамәлләренә кискен бәя бирде: «Коллектив Көнбатышның кагыйдәләренә нигезләнгән дөнья тәртибе концепциясе АКШ һәм Израильнең Иранга каршы сәбәпсез агрессиясенә, һәм шуның нәтиҗәсендә Якын Көнчыгыштагы кораллы конфликтның кабынуына китерде. Инфраструктура җимерелә, дистәеллык халыкара хезмәттәшлек элемтәләре өзелә. Көнбатыш дөньясы икеләтә стандартлар күрсәтә – агрессия гаепләнми, киресенчә, аклау таба. Төркем җитәкчелеге Россия Президенты позициясен уртаклаша: Иранга һөҗүмнең сәбәбе һәм аклавы юк».

Фәләстин-Израиль конфликтына килгәндә, Рөстәм Миңнеханов гуманитар кризисларның дәвам итүен, израиль күченеп килүчеләрнең гамәлләрен, ислам изге урыннарына ирекле керү мөмкинлеге чикләнүен искәртте.

«Безнең ил һәрвакыт БМО Иминлек Советы карарларын үтәү ягында, беренче чиратта бәйсез, суверен Фәләстин дәүләте төзү өчен. Безнең төркем тигезлек, гаделлек һәм халыкларның мәдәни-рухи үзенчәлекләрен хөрмәт итү принципларына тугры», – дип йомгаклады Татарстан Рәисе.

Утырышта шулай ук Россия Хөкүмәте Рәисе урынбасары Марат Хөснуллин РФ Президенты Владимир Путин исеменнән катнашучыларга сәламләү сүзләрен юллады.