Поселокның “Дуслык” фольклор ансамбле быел үзенең 10 еллык иҗат эшчәнлеген билгеләп үтәчәк

Талантларга бай булган иҗат коллективы тамашачыларның күңелләренә үтеп керерлек матур җырларын, шаян такмакларын, дәртле биюләрен, шигъри тәлгәшләрен бүләк итте. Ансамбль баянчысы Ришат Якупов, җырчылар Айгөл Касыймова, Илүзә Кыяметдинова, Галия Кәнәфиева, Клара Кәлимуллина, Зөлфия Шакирова, нәфис сүз остасы Илгизә Сәлахова катнашында үткән концерт махсус хәрби операциядә катнашучыларга ярдәм итү йөзеннән оештырылган хәйрия чыгышлары кысаларында үтте. Һәр чыгышны тамашачылар көчле алкышларга күмделәр, кабат-кабат сорап, кул чаптылар.

Ял итүчеләргә барлык мөмкинлекләр тудыручы, тырыш һәм үз вазыйфаларын җиренә җиткереп башкаручы “Шәфкать” үзәге җитәкчесе Ландыш Мөхлисуллина “артистларны” шәхсән үзе каршы алды, концерт барышында рәхмәт сүзләрен җиткерде, коллективка иҗат уңышлары теләде. Районыбыз ветераннары, шулай ук күрше районнардан да килеп, сәламәтлекләрен ныгытучы өлкәннәр өчен әлеге концерт күңел күтәренкелеге, алдагы көннәргә ышаныч өстәде, яшәү мәгънәсе бирде. Ил-көннәр тыныч булсын, кабат күңелле очрашулар насыйп булсын, дигән теләк яңгырады. 

Гүзәлия Гарипова, “Ак калфак” хатын-кызлар иҗтимагый оешмасының Җәлил бүлекчәсе җитәкчесе.