Маскировка челтәрләрендә аларның да кул җылысы кала

Илдус абый нефть ятмаларының ничек урнашуын, тирәнлеген, биеклеген тикшерүче оператор булса, Энҗе апа нефть чыгару буенча оператор вазифаларын башкара. Икесе дә үз хезмәтләренә 30 елдан артык гомерләрен багышлыйлар, күп санлы Мактау кәгазьләре, Рәхмәт хатлары белән бүләкләнәләр, «Хезмәт ветераны» медаленә ия булалар. Инде лаеклы ялга чыгуларына да дистә ел гына түгел. Ләкин бер генә көнгә дә хезмәттән аерылып торганнары юк. Илдус абый унбер ел поселокның беренче мәктәбендә слесарь вазифаларын башкарган, ә Энҗе апа бүгенге көнгә кадәр поселок ветераннар советы клубында техник хезмәткәр булып эшли. Инде волонтерлар сафына кушылуларына да өч ел тулып узган.

Аларның төп бурычлары – маскировка челтәрләре өчен материаллар әзерләү. Ә соңгыларын волонтерлар Әлмәт шәһәреннән барып алып, туры Гыйниятуллиннар фатирына алып кайталар. Энҗе апа барабанны идәнгә урнаштыра да, тукыманы үлчәп, метр ярымлы кисәкләргә кисеп, төреп, Илдус абыйга тапшыра. Ә анысы аларны пресс астына куя, соңыннан алты сантиметр киңлектәге тасмаларга кисә. Моның өчен ул махсус станок та көйләгән...