Биләрдә «Сәләт»нең беренче сменасы: 800 шәкерт лидерлык серләренә төшенә

Форумда катнашу хокукына Татарстанның төрле почмакларыннан сайлап алынган 12–17 яшьлек 800гә якын үсмер ия булды. Аларның һәрбере «Остазлар» темасына эссе язып, үз казанышларын туплаган портфолио тапшырганнан соң гына Биләргә юл алган.

Рәсми ачылыш тантанасы 27 июньдә узды. Кунаклар арасында Татарстан Рәисе ярдәмчесе, республикадагы «Алдынгылар хәрәкәте» төбәк бүлеге рәисе Тимур Сөләйманов та бар иде. Ул үз чыгышында: «Сезнең һәрберегез — үзенчәлекле дөнья, ә бергә без бөтен галәмне тәшкил итәбез. Безне берләштергән уртак тарих киләчәгебезгә дә юл күрсәтә. «Алдынгылар» сәләтле, ә сәлкешләр һәрвакыт алдынгы», — дип ассызыклады.

Алексеевск районы башлыгы Сергей Демидов та яшьләрне сәламләде. Ул Яшьләр көнендә Биләрдә иң актив егет-кызларның җыелуы мөһим вакыйга икәнен әйтеп, сменаны күңелле һәм нәтиҗәле үткәрергә теләде.

Беренче сменаның төп юнәлеше — остазлык һәм лидерлык. Дүрт көн дәвамында балалар 12 төрле өлкә буенча: мәгариф, фән, мәдәният, экология һәм башкалардан белем алачак. Алар көндәлек мастер-классларда катнашып, теоретик белемнәрен эшчәнлектә ныгыта.

Быелгы яңалык — «Биләр. Тамырлар» проекты. Аның кысаларында археолог, тарих фәннәре кандидаты Зөфәр Шакиров шәкертләрне Биләр казу эшләре һәм археология серләре белән таныштыра.

Форум көннәрен теләгән кеше онлайн күзәтә ала. «Җанлы Сәләт» проекты аша көн саен репортажлар, яңалыклар һәм туры эфирлар «Сәләт»нең рәсми ВКонтакте сәхифәләрендә бара.

«Сәләт» форумы быел 26 июньнән 29 июльгә кадәр дүрт сменада узачак. Барлыгы Татарстаннан, Россия төбәкләреннән һәм чит илләрдән 6 меңгә якын катнашучыны берләштерәсе көтелә. Проект Татарстан Республикасы Рәисе Рөстәм Миңнеханов ярдәмендә гамәлгә ашырыла.