Җәлил интернат-йорты проектта катнаша

"Сарман: иң яңа хәбәрләр", 27 июль 2026 - 13:55

119

Бу проект «СМОГУ-туры выходного дня» дип атала. Ул Рәсәй Президенты грантлары фонды ярдәме белән гамәлгә куела. Проектның җитәкчесе – Баулы шәһәренең «Я СМОГУ» мөмкинлекләре чикле кешеләргә ярдәм итү автоном коммерцияле булмаган оешмасы рәисе Марат Ильясов. Максатчан төркем буларак, аны тормышка ашыруда Җәлил картлар һәм инвалидлар интернат-йортында яшәүчеләр катнашалар.

- Аның кысаларында Җәлил картлар һәм инвалидлар интернат-йортында яшәүче 30 инвалидның иҗтимагый тормышта актив катнашу эшчәнлеге оештырыла. Проект командасы, ял я эш көннәрендә интернатка килеп, төрле чаралар үткәрәчәк. Моңа төрле физик күнегүләр ясау, автор тренажерларында физик сәламәтлекне ныгыту һәм хәрәкәт активлыгын яхшырту буенча турлар үткәрү керә. Әлеге тренажерлар Марат Ильясов тарафыннан уйлап табылган нәтиҗәле тренажерларның берсе санала. Алар ярдәмендә адаптив спортның яңа төре булдырылган һәм үсеш ала, - диде интернат-йорт директоры Азалия Зарипова.

Узган атнада интернатта проект кысаларында беренче чара уздырылды. Анда катнашучылар өчен “СМОГУкар” дип аталучы өч тренажер-машина алып килгәннәр. Максатчан төркем белән эшләүче белгечләрне дә алар белән идарә итәргә өйрәткәннәр. Проектта катнашучыларга уңайлы булсын өчен, уеннарның да күләмле форматтагыларын алып килгәннәр. Моннан тыш, медболлар, гимнастика фитболлары, футбол туплары, йога өчен спорт келәмнәре, теннис туплары, эспандерлар ярдәмендә шөгыльләнү мөмкинлеге булган. Ярышларда өчәр кешедән 11 команда катнашкан. Калганнары кул чабып, көч биреп торганнар. Нәтиҗә ясаган арада, барысы да тәмле күчтәнәчләр белән сыйланганнар. Һәр катнашучыга медаль, диплом, “Я СМОГУ” дип аталган брелок һәм истәлек бүләге тапшырылган.