Яңа Әхмәттә Ризатдиновлар гаиләсе бриллиант туйларын билгеләп үтте

Шул уңайдан бүген аларның йортында тантана оештырылды.
Гаилә тормышы юбилярларын район Башкарма комитеты җитәкчесе урынбасары Индира Сәхипова тәбрикләде, район башлыгы Фәрит Хөснуллиның Рәхмәт хатын, истәлекле бүләкләр тапшырды. Шәйхелмәрдән абый белән Гөлүсә апаны Сарман авыл җирлеге башлыгы Лилия Шәрипова, «Шәфкат» халыкка социаль хезмәт күрсәтү үзәге директоры Ландыш Мөхлисуллина, өйдә социаль хезмәт күрсәтү бүлеге мөдире Айгөл Хәйруллина, район ветераннар Советы һәм инвалидлар җәмгыяте рәисе Асыляр Харисов, Россия Пенсионерлар берлегенең район бүлекчәсе җитәкчесе Нурсинә Хәйруллина да котладылар. Котлауларга юбилярларның хезмәттәшләре дә кушылдылар. 
Шәйхелмәрдән абый белән Гөлүсә апа 3 малай үстергәннәр. Кызганычка каршы, аларның берсе вафат булган. 5 оныклары, 6 оныкчыклары бар. Гөлүсә ханым авыл ветераннар советын җитәкли. Шәйхелмәрдән абыйга 7 декабрьдә 83 яшь тула. Тантаналы чара Россиядә Гаилә елы, инвалидлар ункөнлеге кысаларында үткәрелде.