Сәлимә апаның 95 яшен дә бергәләп каршы алдык

"Сарман: иң яңа хәбәрләр", 21 октябрь 2022 - 15:56

1017

Әле яңа гына кебек, Сарысаз Тәкермән авылында яшәүче Гыйләҗева Сәлимә Фәрвәй кызының 90 яшен билгеләп үткән идек.

Сизелми дә биш ел узып киткән, бүген 95е белән тәбрикләдек. Үзгәрмәгән, СөбханАлла, шул ук мөлаем, сөйкемле, ил-көннәргә хәерхаһлы ветеран каршы алды. Юбилярны истәлекле көне белән район Советы аппараты җитәкчесе Юлия Исмәгыйлова тәбрикләде, изге теләкләрен җиткереп, Рәсәй Президенты Владимир Путинның Котлау хатын, район башлыгы Фәрит Хөснуллин исеменнән истәлек бүләге тапшырды. Район социаль яклау бүлеге начальнигы Лилия Гыйльметдинова, “Шәфкать” үзәге директоры Гөлнара Хуҗина, Иске Имән авыл җирлеге башлыгы Раушания Исламова, балалары, якыннары да Сәлимә апага сихәт гомер, кадер-хөрмәттә яшәвен теләделәр.
- Бер метрлы карчык булсам да, тамырым киң. Аллаһка шөкер, 6 балам бар, 14 онык, 11 кияү, 7 килен, берсе булырга тора, - диде юбиляр, сөенеп.