Район башлыгы Фәрит Хөснуллин райондашларны Физкультурачылар көне белән котлый

Хөрмәтле спортчылар һәм тренерлар, физик культура, спорт хезмәткәрләре, ветераннар, сәламәт яшәү рәвеше алып баручы райондашлар! 
Сезне чын күңелдән Физкультурачы көне – спорт һәм сәламәтлек бәйрәме белән котлыйм! 
Спортны һәм физик культураны үстерү – мөһим бурычларның берсе, чөнки спорт – ул сәламәтлек нигезе. Районыбызда актив яшәү рәвеше алып барыр өчен без барлык шартларны тудырырга тырышабыз. Бүгенге көндә 146 спорт корылмасы эшли. Даими рәвештә физкультура һәм спорт белән шөгыльләнүчеләр арасында укучы балалар, яшьләр генә тугел, өлкән буын кешеләре дә шактый. Күпләр спортны гаиләләре белән үз итәләр. 
Сарман данын яклап, спортчыларыбыз төрле бәйгеләрдә югары нәтиҗәләргә ирешәләр. Алар – безнең горурлыгыбыз. 
Хөрмәтле райондашлар! Физкультура һәм спорт өлкәсен үстерүгә, чемпионнар тәрбияләүгә, сәламәт яшәү рәвешен пропагандалауга өлеш керткән, спортта уңышлар яулаган һәркемгә, спорт ветераннарына рәхмәтемне җиткерәм. Сезгә ныклы сәламәтлек, имин тормыш, уңышлы стартлар һәм зур җиңүләр телим. 
Фәрит Хөснуллин, муниципаль район башлыгы.