Тәкермәндә бер йортны яшен суккан

Нәтиҗәдә бик көчле янгын чыга. 
- Иртәнге өчләрдә, яңгыр тавышы ишеткәч, юып, киптерергә элгән идән паласларын алып керергә, дип, урамга чыктым. Шулчакны көчле яшен булды, - дигән каза күрүче. 
Иске Имән авыл җирлеге башлыгы Раушания Исламова әйтүенчә, Ризилә Минсәгыйть кызының тормыш иптәше моннан берничә ел элек вафат булган, үзе авыл мәдәният йортында техник хезмәткәр булып эшли. 
- Янгын сүндерү машиналары тиз арада килеп җиттеләр, агрофирмадан трактор да килеп өлгерде. Зур рәхмәт аларга. Якын-тирә йортларны саклап кала алдык. Аллаһка шөкер, ялкын күрше ихаталарга күчмәде, - диде җирлек башлыгы. 
Хөрмәтле райондашлар, бәлага тарыган гаиләгә ярдәм кулы сузарга теләүчеләр булса, белешмәләр өчен, 4-34-68 телефон номеры аша авыл җирлеге башкарма комитетына мөрәҗәгать итә аласыз. Ризилә Минсәгыйть кызының телефон номеры – 89872375086.