Сарман хоккейчылары яңа формалы булдылар

Россиянең атказанган спорт мастеры, күп тапкырлар дөнья чемпионы һәм биш тапкыр Гагарин Кубогына ия танылган хоккейчы Данис Зарипов Татарстан Рәисе Рөстәм Миңнехановка балалар хоккей командаларын яңа экипировкалар белән тәэмин итү тәкъдиме белән чыга. Әлеге фикер хупланып, “Яшьләр һәм балалар” милли проекты кысаларында республиканың 41 спорт мәктәбе балалар хоккей командасы “Заряд” экипировкасы белән тәэмин ителә. Республика казнасыннан уен һәм капка формалары, кәшәкәләр алыр өчен финанс бүленә.  
Сарман районы хоккейчылары да бүләксез калмыйлар.
- Тантанада Татарстан Республикасы Премьер-министры Алексей Песошин, ТР Дәүләт Советы депутаты – хоккейчы Данис Зарипов, республиканың спорт министры Владимир Леонов, ТР хоккей Федерациясе башкарма директоры Кирилл Голубев катнаштылар. Безнең укучыларга да 18 комплект бирделәр. Яңа формалар яшь хоккейчыларга бәйрәм рухы бүләк иттеләр. Хәзер спортчыларыбызга максатларына ирешер өчен яңа мөмкинлекләр ачылды. Мондый ярдәм – Татарстан хоккеен үстерүгә зур өлеш кертер һәм үз нәтиҗәләрен күрсәтер, дип ышанабыз. Бүгенге көндә Җәлил Боз сараенда дүрт төркемдә 75 бала хоккей белән шөгыльләнә. Шуларның берсе – кыз бала. Һәр шимбәдә массакүләм бозда шуулар да оештырыла. Без – тренерлар Максим Данилов, Андрей Размочаев һәм мин укучыларда кәшәкәле уенга мәхәббәт, ныклык, җиңүгә омтылыш тәрбияләргә тырышабыз, - диде Ирек Хафизов. 
Әлбәттә, җитәкчелек тарафыннан мондый югары игътибар яшь спортчыларны яңа җиңүләргә рухландырыр, дәрт-дәрман өстәр.