Ләшәү Тамак мәктәбе - "ЭКОлидер-2019" республика бәйгесе җиңүчесе

Әлеге конкурс быел уналтынчы тапкыр үткәрелде. Районыбызның Ләшәү Тамак төп гомумибелем бирү мәктәбе “Гомумибелем бирү оешмаларында экологик белем” номинациясендә җиңү яулады, һәм алар беренче дәрәҗә Дипломга һәм Кубокка лаек булдылар.
- Без бу бәйгегә ел дәвамында әзерләндек. Барлык эш-гамәлләребездә әти-әниләрнең дә зур ярдәмен тоябыз. Укучылар белән бик күп төрле акцияләрдә катнашабыз, өмәләр үткәрәбез. Яз җитеп, кояш карый башлауга ук, мәктәп территориясендә эш кайный башлый. Минемчә, туган якка, табигатькә хөрмәт, мәхәббәт кечкенәдән тәрбияләнергә тиеш. Балалар бакчасы коллективы да бу яктан бик актив, әлеге юнәлештә тәрбия бик көчле. Бу – барыбызның уртак җиңүе, - дип, сөенече белән уртаклашты мәктәп директоры Ринат Дәүләтов.