Юл хәрәкәте иминлеге комиссиясе утырышы узды

Аны комиссия рәисе – район Башкарма комитеты җитәкчесе Фәндәс Вәлиев алып барды. Комиссия эшендә юл хәрәкәте иминлеге буенча Сарман районы кураторы Адель Минһаҗев катнашты. Иң элек сүз район ЮХИДИ бүлеге начальнигы Николай Самойловка бирелде. Ул юл һәлакәтләре һәм аларны булдырмау буенча башкарылган эшләр, чаралар хакында сөйләде. Аннан юллар торышы турындагы информация белән юл идарәсе җитәкчеләре чыгыш ясадылар. Мәгариф бүлеге начальнигы Гөлназ Исмәгыйлова бакча һәм мәктәп укучылары арасында үткәрелә торган профилактик чараларга тукталды. Комиссия членнары аннан видеоконференция режимында республика комиссиясе эшендә катнаштылар. ТР Министрлар Кабинеты Аппараты Җитәкчесе, юл хәрәкәте иминлеген тәэмин итү буенча Хөкүмәт комиссиясе рәисе урынбасары Шамил Гафаров җитәкчелегендә узган киңәшмәдә дә җаваплы хезмәткәрләр алдына бурычлар куелды.