Юмартлык бәрәкәт бирә

Әссәләмүгаләйкүм вә рәхмәтуллаһи вә бәрәкәтүһ, хөрмәтле райондашлар! Барыгызга да, хәерле, имин көннәр телибез.

Раббыбызга чиксез рәхмәтләр булсын — без Рамазан аенда. Бу — Юмартлык ае.

Ибн Габбас (радыяллаһу гәнһү) әйтә: “Пәйгамбәребез с.г.в. бик юмарт кеше иде, ә Рамазан аенда тагын да юмартрак кешегә әйләнә иде”. (Бохари һәм Мөслим риваятьләре) 

Бу хәдис мөселманнарга юмарт булырга, Аллаһ юлында күпмедер малыбызны һәрвакыт сарыф итәргә өнди. Рамазан аенда Аллаһ юлында юмартлыгыбыз, малыбызны сарыф итү тагын да күбрәк булырга тиеш. Безгә шуңа омтылырга кирәк. Һәркем көченнән килгән кадәр Аллаһ Тәгалә юлында малын сарыф итәргә тырышсын. Кемдер ифтар мәҗлесләре әзерли, мәчеткә яки өенә чакырып, авыз ачтыра. Шушы гамәле сәбәпле, Пәйгамбәребез с.г.в.нең сыйфаты белән сыйфатлана. Әгәр мондый эшкә кодрәтебез җитмәсә, болай эшләргә була: күпмедер күләмдә (1, 5, 10 кг) хөрмә сатып алып, мәчетләргә ифтар өчен өләшеп чыгарга мөмкин. Син калдырган хөрмә белән авыз ачалар икән, сиңа да ураза тоткан савап булачак. Мәчетләрдә үткәргән ифтар ашларына көчебездән килгәнчә өлешебезне кертә алабыз.

Сәхәбәләр дә Рамазан аенда фәкыйрь-мескеннәрне ашатырга, авыз ачтырырга тырышкан. Кешеләрне ашату Ислам диненең төп өлеше булып тора. 

Белеп торыйк: Аллаһ Сөбхәнә Тәгалә беркайчан да Аның юлында сарыф иткән малны юкка чыгармый. Күпме изгелек кылсак, фәкыйрь-мескенгә ярдәм итсәк, сәдака бирсәк, Аллаһ Тәгалә берсен дә хисапсыз калдырмый. Киресенчә, малларыбызга бәрәкәт бирәчәк, арттырачак. Чөнки Аллаһ Сөбхәнә Тәгалә изгелек кылучыларны ярата. “Мин изгелек кылучылар белән бергә, аларның бер генә яхшылыгын да әҗер-савапсыз калдырмыйм”, - ди. (Гәнкәбүт сүрәсе, 69 нчы аять). 

Аллаһ Тәгалә калебебезне икейөзлелектән, нифактан, гамәлләребезне риядан, кешегә ошарга тырышудан, телләребезне ялганнан, хәерсез буш сүзләрдән сакласа иде. Шушы Рамазан аенда юмарт булырга, аннан соң да калган көннәребезне юмарт булып, малларыбызны Аллаһ юлында кулланып яшәргә язса иде. Әмин.

Илнур хәзрәт Сабуров, “Тәүфыйк” мәчете имам-хатыйбы