Аллаһның өстен көннәре нәрсә белән аерылып тора

Бөек Аллаһы Тәгалә бөтен галәмнәрне юктан бар кылып кына калмый, шул галәмнәр эчендәге әйберләрнең кайсыберләрен икенчеләреннән өстен куя. Мәсәлән, Аллаһ фәрештәләрне ясады, ә алар арасыннан Җәбраил фәрештәне иң өстене итте. Шулай ук, кешелек дөньясын барлыкка китергәннән соң, Бөек Раббыбыз алар арасыннан иман китерүчеләрне генә яратты, ә иман китерүчеләр арасыннан пәйгамбәрләрне беренче дәрәҗәгә куйды. Барлык җирләрне барлыкка китергәннән соң, ул җирләр арасыннан Мәккә белән Мәдинә шәһәрләрен “изге урыннар” дип билгеләде. Вакытлар белән дә шул ук хәл: елларны, айларны һәм көннәрне Ул тәртипкә салды һәм елның кайбер көннәрен башка көннәрдән өстенрәк итте. Моңа мисал: Рамазан ае – айларның солтаны, Җомга көн – атнаның бәйрәм көне, Кадер кичәсе – мең айдан хәерлерәк, хәзер дәвам итә торган Зөлхихҗҗә аеның беренче ун көне – Аллаһы Тәгалә махсус билгеләп куйган ункөнлек. 

Нәрсә белән аерылып тора соң бу ун көн? Сөекле пәйгамбәребез Мөхәммәд (аңа Аллаһның салаваты һәм сәламе булсын) бер хәдисендә әйтә: “Аллаһы Тәгалә каршында Зөлхиҗҗә аеның беренче ун көнендә кылынган изгелекләрдән дә өстенрәге булмас”, – ди. Шуның кадерен белеп, пәйгамбәребез һәм аның сәхәбәләре моның тугыз көнен ураза, Аллаһны бөекләп, зикер сүзләрен күбәйтү, мохтаҗфәкыйрьләргә игътибарны арттыру кебек изге гамәлләрдә үткәргәннәр, ә төннәрен өстәмә намазлар укый торган булганнар. Ә инде унынчы көнен – Корбан гаетен – шөкер йөзеннән Аллаһ ризалыгы өчен корбанлыкларны чалып, бәйрәм итеп үткәргәннәр.