Район муниципаль хезмәткәрлэре спартакиадада 4 урынны алдылар

Ел саен республикада муниципаль хезмәткәрләр арасында спартакиада уздырыла. Быел да аңа старт бирелде. Ярышларда Сарман районы муниципаль хезмәткәрләре дә катнашалар. 2-3 ноябрь көннәрендә Мамадыш шәһәрендә ир-ат командалары арасында волейбол ярышлары үтте. Моңа кадәр март аенда чаңгы ярышлары, аннан хатын-кызлар волейболы уздырылган иде. Спартакиада 3 төркем арасында уза. Беренче төркемгә - шәһәрләр, икенчегә - зур районнар, өченчегә халык саны аз булган кече районнар керә. Безнекеләр икенче төркемдә ярышалар. Анда барлыгы 18 команда чыгыш ясый. Волейбол буенча ир-егетләр уңышлы чыгыш ясап, үз төркемнәрендә 4 урынга лаек булдылар. Без аларны тәбриклибез һәм башка ярышларда да җиңүләр телибез. Эле алда мини футбол, шахмат, йөзү, өстәл теннисы, бадминтон, җиңел атлетика буенча көч сынашулар көтә. Уңышлар юлдаш булсын!