Цифрлы тигезлек: 73 авыл заманча элемтәле булачак

2026 елда «Белешмәләр икътисады» илкүләм проекты кысаларында республика авылларында тагын 73 яңа база станциясе барлыкка киләчәк.

Үзебезнең җиһазлар һәм югары сыйфат

Цифрлы үсеш министры Илья Навчин сүзләренчә, төзелеш эшләрендә тулысынча илдә җитештерелгән җайланмалар кулланылачак.

> «Вышкалар төзү буенча Татарстан традицион рәвештә илкүләм лидерлар рәтендә. Элек чит ил җиһазларына бәйле булсак, 2025 елдан башлап станцияләрне Россиядә ясалган заманча корылмалардан төзибез», — дип билгеләп үтте министр.

Авыл халкына — тиз кәрәзле интернет

Программа нигезендә 100дән 500гә кадәр кеше яшәүче ерак торак пунктлар сыйфатлы элемтә һәм югары тизлекле 4G интернеты белән тәэмин ителәчәк. Бу авыл халкына яшәү урынына бәйсез рәвештә:

 * цифрлы сервислардан файдаланырга;

 * онлайн форматта белем алырга һәм эшләргә;

 * туганнары һәм якыннары белән һәрчак элемтәдә калырга мөмкинлек бирә.

Халык тавышы хәл итә

Станцияләр урнаштырылачак авыллар исемлеге «Дәүләт хезмәтләре» порталындагы тавыш бирү нәтиҗәләре нигезендә төзелә. Шулай итеп, элемтә сыйфаты өчен халык үзе тавыш бирә.

Саннар һәм фактлар:

 * 2022 елдан бирле Татарстанның кече авылларында 274 LTE база станциясе сафка бастырылган.

 * Соңгы бер елда гына да 33 меңнән артык кеше югары тизлекле интернетка керү мөмкинлеге алган.