Казанда 14 яшьлек үсмер әнисенең автомобилен рөхсәтсез алып киткән һәм ЮХИДИ хезмәткәрләреннән качарга тырышкан. ТР Эчке эшләр министрлыгы мәгълүматларына таянып, бу хакта «Татар-информ» хәбәр итә.
Мәгълүматларга караганда, яшь егетнең машина йөртү таныклыгы булмаган. Шуңа карамастан, ул салонга 13 яшьлек сеңлесен һәм 3 яшьлек энесен дә утыртып, юлга чыккан. Юл-патруль хезмәте инспекторларының туктау таләбен игътибарсыз калдыргач, алар үсмернең артыннан куа киткән.
Качу вакытында үсмер юл хәрәкәтендә куркыныч хәлләр тудырган: тизлекне чиктән тыш арттырган, каршы як полосага һәм светофорның кызыл утына чыккан. Нәтиҗәдә, хокук сакчылары аны туктатуга ирешкән.
Тәртип бозучының ата-анасына карата биш административ беркетмә төзелгән, балаларга тиешле тәрбия бирмәгән өчен штраф салынган. Автомобиль исә штраф стоянкасына озатылган.
Нет комментариев