Ел башыннан бирле Татарстан юлларында 37 җәяүле һәлак булган, шуларның 23е — караңгы вакытта. Бу хакта республика Дәүләт автоинспекциясе мәгълүматларына таянып «Татар-информ» МА хәбәр итә.
Гыйнвар-август айларындагы статистика узган елның шушы чоры белән чагыштырганда аяныч саннарның артуын күрсәтә:
- Караңгы вакытта һәлак булучылар: 23 кеше (узган елның аналогик чорында — 14);
- Барлыгы һәлак булган җәяүлеләр: 37 кеше (узган елдагыдан 8гә күбрәк);
- Машина астында калучылар: барлыгы 457 җәяүле, шуларның 435е төрле җәрәхәтләр алган.
Татарстан Дәүләт автоинспекциясе начальнигы вазыйфаларын вакытлыча башкаручы Айрат Самигуллин юлны фәкать билгеләнгән урыннарда гына һәм куркынычсызлыкка тулысынча инангач кына чыгарга кирәклеген искәртеп үтте. Көннәр кыскарган чорда ул яктылык кайтаргыч элементларны (фликерларны) кулланырга киңәш итә.
Яктылык кайтаргычлар, гадәттә, балалар киемендә, рюкзакларда һәм велосипедларда була. Бүген балалар товарлары җитештерүчеләр куркынычсызлык мәсьәләсен алдан ук уйлый. Шулай да, республика ЮХИДИ хезмәткәрләре билгеләп үтүләренчә, бала киеменә өстәмә яктырткычлар ябыштыру да артык булмас. Бу киңәшне өлкәннәргә дә үтәргә кирәк.
Нет комментариев