Татарстанда капиталь ремонт программасына 18 ел: нәтиҗәләр һәм планнар
Татарстанда күп фатирлы йортларны капиталь ремонтлау программасына 18 ел вакыт узды. Бу чорда республикада 12 меңнән артык йорт яңартылган. Тулаем алганда, 54 миллион квадрат метр торак мәйданына ремонт үткәрелгән, ә программага 107 миллиард сумнан артык акча юнәлтелгән. Нәтиҗәдә, 2 миллионнан артык татарстанлының яшәү шартлары яхшыртылган, дип яза «Татар-информ» МА.
2026 елда программа республиканың 41 муниципаль берәмлегендә 813 йортны колачлый. Быелгы эшләргә 11 миллиард 119 миллион сум акча бүлеп бирелгән. Төп игътибар түбәләрне һәм фасадларны яңартуга, инженерлык челтәрләрен алыштыруга, шулай ук йортларның энергия нәтиҗәлелеген арттыруга юнәлтелә.
Лифтларны алыштыру — программаның мөһим юнәлешләренең берсе. Быел 56 йортта 124 лифтны яңарту планлаштырыла. Киләчәккә карап, 2026-2029 елларда республикада срогы чыккан 1474 лифтны алыштырырга кирәк булачак. Шуларның 980е — төбәк операторы счетында, 494е — йортларның махсус счетларында.
Моннан тыш, быел 19 муниципалитетта 141 күп фатирлы йортта газ куркынычсызлыгын тәэмин итү өчен вентиляция каналларын һәм төтен чыгару юлларын яңарту күздә тотыла. Әмма мондый эшләрне башкару өчен торак милекчеләренең гомуми җыелышы карары таләп ителә.
ТР төзелеш, архитектура һәм ТКХ министрының беренче урынбасары Дамир Шәйдуллин брифингта программаның нәтиҗәләре турында хисап бирде.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
Нет комментариев