Район өлкәннәре Чаллыдан җиңү белән кайттылар

"Сарман: иң яңа хәбәрләр", 9 сентябрь 2019 - 11:09

2157

Район өлкәннәре Скандинав алымы белән йөрү буенча узган фестивальдә катнашып, 26 район арасында җиңүче булып танылдылар.

Фестиваль 6 сентябрьдә Яр Чаллы шәһәрендә узды. Аны Россия пенсионерлар берлегенең шәһәр бүлекчәсе оештырды. Районнан ярышларда берлекнең Сарман бүлекчәсе рәисе Нурсинә Хәйруллина җитәкчелегендәге унбер кеше катнашты. Сарманнан Дилүс Гомәров 5 километрлы дистанциядә – беренче, Җәлилдән Нәфис Мәхмуров өченче урыннарны яуладылар. Саклаубаштан Зөлфия Фәттахова 3 километрлы дистанциядә – беренче, Мортыштамактан Роберт Гәрәев – өченче булдылар. Гомуми очколар буенча район командасын узучы булмады.