8 мартка сюрприз: быел голланд тюльпаннары булмаячак

Барлык тюльпаннар да диярлек Россиядә үстерелгән һәм кыйммәт булачак, дип яза «Российская газета», Чәчәк сатучылар берлеге рәисе Алексей Антиповка сылтама белән.

«Бу – санкция, коронавирус, башка вакыйгалар белән бәйле түгел. Чынлап та импортны алыштыру булды. Россиядә чәчәк үстерүчеләр берничә йөз исәпләнә», – дигән ул.

Тюльпаннар иң күп сатыла торган чәчәк түгел. Чәчәк базарында иң зур урынны алып торганнары – розалар (49%), хризантемалар (15%), канәферләр (11%), гербералар (8%). Тюльпаннарны башлыча 8 мартта алалар, бу – барлык күләмнең 10% тәшкил итә. Март башында 150 миллион чәчәк сатыла икән – бу һәр хатын-кызга елына 2-3 букет бүләк итәләр, дигән сүз.

Соңгы 5 елда чәчәк үстерү бизнесы 68%ка арткан. 2016 елда 200,8 млн данә үстерсәләр, 2021 елда – 338,9 млн. Элек чәчәкләрне Голландия (34%), Эквадор (33%), Беларусь (9%), Кения (8%), Колумбия (6,6%) сатса, соңгы елларда үзебездә үстерелгәннәр арта бара. Шулай да җирле чәчәкләр барлык күләмнең 17 %ын гына тәшкил итә икән. Голландияне Африка иле Кения һәм Латин Америкасы иле Эквадор кысрыклап чыгарып бара. 

Чыганак: https://intertat.tatar/news/8-martka-syurpriz-byel-golland-tyulpannary-bulmayacak-5857872