Өчиле Саклауда Рәсимә апа 90 яшьлек юбилеен билгеләп үтте

Аны гомер бәйрәме белән район Башкарма комитеты җитәкчесе Альфис Мөхәммәтгәрәев тәбрикләде, Россия Федерациясе Президенты Владимир Путинның Котлау хатын, кыйммәтле бүләк һәм Бөек Җиңүнең 75 еллыгы уңаеннан юбилей медале тапшырды. Юбилярга котлау сүзләрен шулай ук социаль яклау бүлеге начальнигы Лилия Гыйльметдинова, “Шәфкать” халыкка социаль ярдәм күрсәтү үзәге директоры Гөлнара Хуҗина, район ветераннар советы рәисе Нәҗип Миңнеголов, Саклаубаш авыл җирлеге башлыгы Лилия Габидуллина җиткерделәр.
Рәсимә апа шушы авылда туып үсә, бик иртә колхозда эшли башлый, тормыш иптәше Әмирҗан абый белән ике ул, бер кыз үстерә. Алты оныгы, сигез оныкчыгы бар.
Рәсимә апа турындагы тулырак язманы газетабызның киләсе саннарының берсендә укый аласыз.
Зөлфия Шәрипова язмасы һәм фотолары